Starfsreglur Vísindasjóðs

Starfsreglur við úthlutun styrkja úr vísindasjóði

háskólamenntaðra starfsmanna STAG hjá Garðabæ

Almennar reglur um úthlutun

Starfsmaður sem hefur hlotið styrk úr sjóðnum getur að jafnaði ekki fengið nýjan styrk fyrr en 24 mánuðir eru liðnir frá dagsetningu síðustu styrkveitingar.

Stjórn sjóðsins er heimilt að víkja frá þessu ákvæði ef sérstaklega stendur á, enda liggi fyrir rökstudd ákvörðun þar að lútandi.

 

Reglur vegna styttri námskeiða og kynnisferða

Úthlutun fer fram tvisvar á ári með umsóknarfresti til 1. maí og 1. október eða þegar stjórn sjóðsins ákveður. Stjórn sjóðsins er heimilt að úthluta styrkjum þó umsókn berist á öðrum tíma.Við mat á umsóknum skulu eftirfarandi atriði m.a. höfð til hliðsjónar:

  • Gildi námskeiðsins eða ferðarinnar fyrir starf umsækjanda.
  • Hve langt er síðan viðkomandi starfsmaður fékk síðast úthlutað úr sjóðnum.

Styrkir vegna námskeiða og kynnisferða eru greiddir samkvæmt staðfestingu á kostnaði. Hámarksfjárhæð styrks er kr. 325.000. Heimilt er að hækka styrk um allt að kr. 200.000 vegna ferðakostnaðar og uppihalds.

 

Reglur vegna styrkveitinga til framhaldsnáms

Úthlutun fer fram einu sinni á ári með umsóknarfresti til 1. maí. Afgreiðsla sjóðsstjórnar skal liggja fyrir eigi síðar en einum mánuði eftir lok umsóknarfrests. Stjórn sjóðsins er heimilt að úthluta styrkjum þó að umsókn hafi ekki borist í umsóknarfresti.

Starfsmaður getur sótt um styrk úr sjóðnum til greiðslu á kostnaði sem hann ber vegna framhaldsnáms.

Við mat á umsóknum skulu eftirfarandi atriði m.a. höfð til hliðsjónar:

  1. Gildi námsins fyrir starf umsækjanda.

2. Hve langt er síðan viðkomandi starfsmaður fékk síðast úthlutað úr sjóðnum.

3. Styrkir miðast við umfang náms:

  • Að lágmarki 20 eininga nám – allt að 360.000 kr. styrkur.
  • Að lágmarki 30 eininga nám – allt að 430.000 kr. styrkur.
  • Að lágmarki 40 eininga nám – allt að 495.000 kr. styrkur.
  • Að lágmarki 48 eininga nám – allt að 585.000 kr. styrkur.
  •  

Þegar ekki liggja fyrir nákvæmar upplýsingar um einingafjölda viðkomandi náms er stjórn sjóðsins heimilt að meta nám til gildis eininga samkvæmt ofangreindu.

Styrkir eru greiddir að 2/3 hluta við staðfestingu á skráningu í viðkomandi nám. Eftirstöðvar greiðast við staðfest námslok eða áfangalok.

Styrkþegi skal leggja fram staðfestingu á loknum einingum eða námslokum innan hæfilegs tíma frá lokum þess náms sem styrkur var veittur til. Liggi ekki fyrir staðfesting á loknum einingum eða námslokum innan 24 mánaða frá fyrstu greiðslu styrks er sjóðsstjórn heimilt að krefjast endurgreiðslu á þeim hluta styrks sem þegar hefur verið greiddur. Ef styrkur er veittur vegna náms sem nemur að lágmarki 20 einingum skal lokagreiðsla styrks miðast við staðfestan fjölda lokinna eininga. Hafi umsækjandi lokið færri einingum en umsókn gerði ráð fyrir getur sjóðsstjórn ákveðið að lækka styrk hlutfallslega eða krefjast endurgreiðslu á hluta hans.

 

Reglur vegna styrkveitinga til rannsóknar- og þróunarverkefna

Úthlutun fer fram einu sinni á ári með umsóknarfresti til 1. maí. Afgreiðsla sjóðsstjórnar skal liggja fyrir eigi síðar en einum mánuði eftir lok umsóknarfrests. Stjórn sjóðsins er heimilt að úthluta styrkjum þó að umsókn hafi ekki borist í umsóknarfresti.

Við mat á umsóknum skulu eftirfarandi atriði m.a. höfð til hliðsjónar:

  • Gildi verkefnisins fyrir þróun innan stofnunarinnar.
  • Nýbreytnigildi verkefnisins.
  • Skipulag verkefnis – markmið – vinnuferli.
  • Hvort verkefnið hlýtur styrki úr öðrum sjóðum.

Heimilt er að veita styrki vegna:

  • Vinnu umsækjanda við verkefnið utan venjulegs vinnutíma.
  • Ferðakostnaðar samfara verkefninu.
  • Aðkeyptrar þjónustu.

Sjóðsstjórn ákveður með hvaða hætti greiðslum til styrkþega er háttað, en lokagreiðsla skal þó ekki fara fram fyrr en lokaskýrslu um verkefnið hefur verið skilað. Ef verkefni fer ekki af stað eða lokaskýrslu er ekki skilað innan þess tíma sem sjóðsstjórn ákveður er sjóðsstjórn heimilt að fella niður ógreiddan styrk og krefjast endurgreiðslu á þeim hluta styrks sem þegar hefur verið greiddur.

Umsóknir

Umsóknum um styrki skal skilað til stjórnar rafrænt. Umsóknir eru aðgengilegar að heimasíðu Starfsmannafélags Garðabæjar www.stag.is.

 

Samþykkt af stjórn vísindasjóðs 9. mars 2026.