Reglur Vísindasjóðs STAG

REGLUR

um vísindasjóð háskólamenntaðra starfsmanna Garðabæjar

Reglur þessar gilda um starfsemi vísindasjóðs háskólamenntaðra starfsmanna Garðabæjar og úthlutun styrkja úr sjóðnum.

1. gr.

Sjóðurinn heitir Vísindasjóður háskólamenntaðra starfsmanna Garðabæjar. Heimili og varnarþing sjóðsins er í Garðabæ.

2. gr.

Aðild að sjóðnum eiga þeir félagsmenn Starfsmannafélags Garðabæjar (STAG) sem greitt er framlag fyrir í sjóðinn samkvæmt kjarasamningi.

3. gr.

Markmið sjóðsins er að auka tækifæri félagsmanna til framhaldsmenntunar, endurmenntunar, rannsókna og þróunarstarfa. Sjóðurinn veitir m.a. styrki til rannsóknar- og þróunarverkefna, námskeiðsgjalda, skólagjalda, ferða- og dvalarstyrkja, auk styrkja vegna námskeiða og annarrar símenntunar.

4. gr.

Stjórn sjóðsins skal skipuð tveimur fulltrúum tilnefndum af stjórn Starfsmannafélags Garðabæjar og tveimur fulltrúum tilnefndum af Garðabæ. Stjórn sjóðsins setur nánari starfsreglur í samræmi við markmið sjóðsins. Stjórnin heldur fundi eftir þörfum og ræður afgreiðslu umsókna.

5. gr.

Tekjur sjóðsins eru framlög úr bæjarsjóði samkvæmt kjarasamningi, vaxtatekjur og aðrar tekjur sem kunna að falla til. Framlag í sjóðinn samkvæmt kjarasamningi nemur 1,5% af föstum dagvinnulaunum þeirra starfsmanna sem aðild eiga að sjóðnum.

6. gr.

Reikningsár sjóðsins er almanaksárið. Reikningar sjóðsins skulu endurskoðaðir af löggiltum endurskoðanda Garðabæjar.

7. gr.

Þrátt fyrir að sjóðurinn sé ætlaður háskólamenntuðum starfsmönnum er stjórn sjóðsins heimilt að veita starfsmanni aðild að sjóðnum þótt viðkomandi hafi ekki lokið háskólanámi, ef starf það sem hann eða hún gegnir gerir kröfu um háskólamenntun samkvæmt starfslýsingu eða öðrum viðurkenndum hæfniskröfum hjá Garðabæ.

Sama á við ef starf hefur þróast með þeim hætti að gera mætti ráð fyrir að krafa um háskólamenntun yrði gerð ef starfið væri auglýst til umsóknar á ný. Í slíkum tilvikum skal umsækjandi sýna með rökstuddu mati hvernig starf hans fellur að reglum vísindasjóðs. Meti stjórn umsókn sem fullnægjandi er heimilt að veita umsækjanda aðild að sjóðnum.

8. gr.

Reglur þessar taka gildi frá og með 13. mars 2026.