Reglur Menntasjóðs STAG

Reglur Menntasjóðs STAG

1. grein

Sjóðurinn heitir Menntasjóður félagsmanna í Starfsmannafélagi Garðabæjar (STAG) og starfar hann með því skipulagi og markmiði sem segir í þessari reglugerð.

Heimili sjóðsins og varnarþing er í Garðabæ.

2. grein

Markmið sjóðsins eru:

a) Að greiða að hluta eða fullu námskeið er sjóðfélagar sækja eða nám er þeir stunda til að auka við almenna menntun sína eða áhugasvið

b) Að taka þátt í kostnaði við menntun sjóðfélaga ef störf þeirra eru lögð niður vegna tækni- eða skipulagsbreytinga og gera þeim þannig kleift að taka að sér önnur störf

c) Að veita þeim er hafa verið sjóðfélagar í að minnsta kosti fimm ár og eru að nálgast eftirlaunaaldur fjárstyrk til að skapa sér ný viðfangsefni. Sjóðfélagar geta átt rétt á slíkum styrk í allt að tvö ár eftir að þeir hafa lokið störfum fyrir aldurs sakir.

d) Að veita fé til námskeiðahalds eða annarrar fræðslustarfsemi á vegum STAG.

3. grein

Stjórn sjóðsins skal skipuð fjórum aðilum til tveggja ára í senn. Tveir skulu kosnir á aðalfundi STAG og tveir skipaðir af bæjarstjórn. Stjórnin skal halda gerðabók og rita í hana allar ályktanir sínar. Meirihluti stjórnarmanna þarf að greiða ályktun atkvæði til að hún sé lögleg.

4. grein

Tekjur sjóðsins eru:

a) Framlag úr bæjarsjóði Garðabæjar í samræmi við gildandi kjarasamning, nú 0,4% af heildarlaunum sjóðfélaga

b) Vextir.

5. grein

Umsækjandi skal hafa verið í STAG eigi skemur en eitt ár til að eiga rétt á styrk.

Hafi umsækjandi greitt í stéttarfélög innan BSRB getur hann flutt félagsaldur yfir til STAG. Til þess að fá félagsaldur metinn þarf að skila inn yfirliti yfir greiðslur frá fyrri stéttarfélögum.

Umsækjandi skal vera í starfi þegar hann sækir um og notar styrkinn nema staða hans hafi verið lögð niður og styrkurinn varði menntun hans eða endurhæfingu eða um eftirlaunaþega sé að ræða, sbr. c-lið 2. greinar.

Fari félagsmaður á atvinnuleysisbætur og greiðir jafnframt félagsgjöld til STAG, heldur hann réttindum sínum í allt að eitt ár.

Sjóðstjórn skal ákveða hámark úthlutunarstyrks samkvæmt stöðu sjóðsins hverju sinni. Upphæð styrks er mismunandi eftir því hvert starfshlutfall umsækjanda síðustu 12 mánaða er og hversu lengi hann hefur greitt iðgjald í STAG.

Umsækjandi sem hefur verið í fullu starfi í a.m.k. fimm ár og fer í skert starfshlutfall vegna aldurs getur óskað eftir óbreyttum réttindum.

Frá og með árinu 2022 eru styrkupphæðir sem hér segir. Upphæðirnar voru endurskoðaðar árið 2026 og haldast óbreyttar.

6. grein

Greitt er úr sjóðnum ellefu sinnum á ári. Umsóknarfrestur er til og með 20. hvers mánaðar og styrkir eru greiddir út 25. sama mánaðar eða næsta virka dag þar á eftir.

Í desember er umsóknarfrestur þó til og með 15. desember og styrkir greiddir út 20. desember eða næsta virka dag þar á eftir. Ekki er greitt úr sjóðnum í júlí.

7. grein

Sótt er um styrk rafrænt á „Mínum síðum“ STAG.

Umsóknin er stöðluð og skal þar tilgreina umbeðna styrkupphæð, lýsingu á því námi eða verkefni sem sótt er um styrk vegna og áætlaðan kostnað.

Stjórn Menntasjóðs tekur ákvörðun um styrkveitingu á grundvelli þeirra upplýsinga sem fram koma í umsókn. Ófullnægjandi eða rangar upplýsingar geta leitt til þess að umsókn verði hafnað.

Styrkir eru eingöngu greiddir gegn framvísun löglegra reikninga sem gefnir eru út á nafn og kennitölu umsækjanda og eru ekki eldri en 12 mánaða.

8. grein

Styrkir úr Menntasjóði eru skattskyldir, en heimilt kann að vera að færa kostnað til frádráttar samkvæmt reglum skattyfirvalda. Upplýsingar um styrkþega og styrkfjárhæðir eru sendar skattyfirvöldum.

Styrkþegi ber ábyrgð á að varðveita reikninga og önnur fylgigögn vegna þess kostnaðar sem styrkur hefur fengist fyrir. Styrkþegum er bent á að kynna sér gildandi reglur Skattsins um skattalega meðferð styrkja á hverjum tíma.

9. grein

Gjaldkeri STAG annast reikningshald sjóðsins, innheimtir tekjur sjóðsins og innir af hendi greiðslur úr honum eftir tilvísun sjóðstjórnar.

Reikningsár sjóðsins er almanaksárið. Ársreikninga skal semja með ársreikningi STAG.

10. grein

Árlega skal sjóðstjórn gera skýrslu þar sem gerð er grein fyrir fjárhag sjóðsins og starfsemi hans næsta reikningsár á undan. Skýrslan skal afhent bæjarstjórn og stjórn STAG.

11. grein

Reglugerð þessi öðlast gildi með samþykki stjórnar STAG 15. september 2026.